Asinamos un convenio co CSIC para o subministro de árbores autóctonas

A Asociación Monte Pindo Parque Natural e o grupo de Biotecnoloxía e mellora forestal do Instituto de Investigacións Agrobiolóxicas de Galicia (IIAG), dependente do Consejo Superior de Investigaciones Científicas (CSIC), acaban de asinar esta mañá un Convenio polo cal ambas partes comprométense a colaborar mutuamente nos seus proxectos en marcha e futuros.

Convenio asinado

Nomeadamente, no que afecta ao Monte Pindo, o IIAG-CSIC proporcionará ao proxecto SOS Monte Pindo árbores autóctonas coma ameneiros, carballos e castiñeiros certificados xeneticamente e que forman parte do seu Banco de Xermoplasma, un banco de sementes no cal conservan xenotipos extraídos de árbores senlleiras e representativas do noso país, co gallo de poder reproducilas no futuro cantas veces sexa necesario. Por outra parte, o IIAG-CSIC proporcionará asesoramento á Asociación Monte Pindo no proxecto de repoboación.

Pola súa parte, o IIAG-CSIC pretende garantir o futuro da especie Quercus lusitanica (Carballo anano), que periga despois do incendio que asolou o Monte Pindo este verán. Por iso pretende localizar especimes sans para crear o Banco de xermoplasma de Quercus lusitanica do Monte Pindo. O convenio ratificou a colaboración da Asociación Monte Pindo nesa iniciativa.

Esta fin de semana o Monte Pindo beneficiarase por primeira vez deste convenio e recibirá unha ducia de ameneiros de ata ano e medio de idade destinados á súa aclimatación na Sementeira do proxecto en Lamas de Castelo.

Medio cento de voluntarios inscritos na primeira fin de semana de #SOSMontePindo

Foto: Santi Llecha

O Proxecto SOS Monte Pindo non puido nacer con mellor pe, pois xa conta con medio cento de persoas inscritas nos primeiros dous días que o formulario web leva aberto a inscricións. E isto a pesar dos problemas técnicos que durante a fin de semana impediron visibilizar correctamente os contidos en varias plataformas, e que xa foron subsanados esta mañá.

A primeira xornada efectiva de traballo terá lugar o 17 de novembro, no que cando menos unhas corenta persoas dedicaranse a voluntariado físico na zona, que dependendo das condicións meteorolóxicas consistirá en prevención de escorrentías no monte arrasado ou ben na recollida e plantación de landras e sementes destinadas á creación da sementeira de Lamas de Castelo. Na xornada prevese a participación das nenas e nenos dun Centro de Acollida.

Mentras tanto as mariscadoras confirman que as cinzas seguen a arribar á Berberecheira e que están a solidificar en forma dunha capa de máis de 25 centímetros dunha especie de argamasa negra moi difícil de retirar.

Dámoste a benvida a SOS Monte Pindo!

Hoxe, día 1 de novembro de 2013, Día de Defuntos, nace SOS Monte Pindo.
Aquí podes atopar toda a información sobre o proxecto de voluntariado para recuperar o Monte Pindo para o disfrute e a mellora da calidade de vida de todas e todos.
Aquí podes inscribirte no voluntariado, facernos un donativo de árbores, ferramentas ou cartos e mesmo mandarnos as túas ideas para mellorar o proxecto.
 Date unha volta pola páxina e se botas algo en falta ou atopas un erro cóntanolo!
Tamén lembra compartir cos teus esta páxina para que consigamos a máxima difusión posible!
En redes sociais, podes seguir toda a actividade deste proxecto en Facebook e Twitter rastreando o hashtag #sosmontepindo.