![](https://blogger.googleusercontent.com/img/b/R29vZ2xl/AVvXsEjZVWKkzBjhpT-Ny81pLmhKFX_o4FfH2uzOV30AfnUQAeE3HGQ6czdeVZvtBNhSfRJkcO4DOIpWTXCnTbvvGnU2dVDo1GfiSvKHSwsVLCKsuMDzVKMYFPEz4Hq1RKPUBVbCuLl_84w2Shw/s320/DSC_1271.jpg)
O proxecto de voluntariado para recuperar o Monte Pindo non puido iniciarse con mellor pe, pois foron unha trintena de nenas e nenos cos seus monitores e voluntarios os que se ocuperon do espazo natural ao longo dunha xornada enteira na que o tempo acompañou. Como anfitrións por parte da Asociación actuaron Xil Caamaño, Sven Schwebsch, Antía Insua e Mario Maceiras.
![](https://blogger.googleusercontent.com/img/b/R29vZ2xl/AVvXsEhqfttzKdkRfyTYozq0855vVNLhKjNZComHyesv_Kldtyaf5NeuAExSbDnmvhun7YqKtQf6EXYgPNVhbFFecOf-viuUafRCpa_T6zysa8UdGRkeCgTH2h940b4KFG2XdczUDcWfsrIPVTA/s200/DSC_1269.jpg)
Pola mañá, o voluntariado dividiuse en dous grupos: os maiores dedicáronse a plantar na
sementeira de Lamas de Castelo unha ducia de ameneiros cedidos polo IIAG-CSIC como primeira colaboración do
convenio recén asinado, mentras o grupo dos máis cativos internouse polo Bico do Santo para recoller cepellóns de pequenos carballos, loureiros e ata un eucalipto recollido por erro e que obviamente foi desbotado por non corresponder coa filosofía deste proxecto.
Logo de xantar, puxemos a proa cara o Monte Pindo, e novamente dividimos dous grupos. Esta vez os máis pequechos serían os que plantarían uns 50 carballos, mentras os maiores marcharon cara o Rego Voitureiro para, provistos de bolsas de gramíneas coma cebada e herba, ventear uns 50 kg de sementes nas ladeiras máis escarpadas, que seguían tan desprovistas de toda vexetación coma se o incendio se extinguise onte mesmo. Ao fío das 6 e media da tarde, e cando os máis pequechos xa comezaban a acusar o cansanzo, volvían ao autobús que os trouxera desde Miño logo dunha emotiva despedida e aplauso mutuo.
![](https://blogger.googleusercontent.com/img/b/R29vZ2xl/AVvXsEiFI8Mt6AvPSJc6KBIPNSM8Fu38xZ3mpUavZLvR-kuF4GE2gfcX4q_p85HLulIpkfxDZaOtxDdtBmskvs7ApP2MtJm8PB40O78kEfAdSUXx0a0o764IleY1zaXdbwX7aWPer5DywF0GEeY/s200/DSC_1270.jpg)
A
Asociación Monte Pindo desexa expresar novamente a súa emoción por que fosen manciñas de entre 6 e 17 anos as que deran este primeiro paso en defensa do noso medio natural e concretamente pola recuperación do Olimpo Celta, e porque moitos deles que nunca antes prantaran unha árbore puidesen concienciarse da importancia de coidar o noso medio ambiente, nunha xornada na que non faltaron os risos, os xogos, os chíos cada vez que un desprevido verme decidía asomarse a ver que pasaba, pero sobre todo non faltou o compañeirismo nin o amor pola terra na que afundiran as súas pequenas mans. Asi mesmo, queremos agradecer infinitamente o bo facer e a profesionalidade dos monitores e voluntarios do Centro de Acollida de Bañobre (Miño) para que a xornada fose perfecta e o seu compromiso decidido de seren os primeiros en dar este paso. O futuro do Monte Pindo xa é voso!
Aparece tiroteado un cartel de "Vedado de caza"
![](https://blogger.googleusercontent.com/img/b/R29vZ2xl/AVvXsEgEric57e7iDlYoxkNSrNjuB2nRnthTiT_IzjKz70WP62XYOplcoXPK2PkaHFxaNJCYkrBroy5VqiJlbjB353zK4WNcz9OocRXxWUwnEjao7QdD0ch3z6AOObLoRjZs2EKXNK08KI7IkXY/s200/DSC_1272.jpg)
A parte negativa da Xornada, a parte de volver a transitar por unha paraxe desolada onde o único son era o dos pasos e as palabras do voluntariado, foi o achádego á beira dunha pista no Chan das Lamas dun cartel que lembra a completa prohibición de cazar neste espazo, e que antes do incendio fora totalmente acribillado por un total de 8 impactos de bala que demostran a absoluta impunidade reinante neste espazo no que a vixilancia -que si se garante nun Parque Natural- brilla pola súa ausencia. Agustín Hernández, Marisol Piñeiro e demais individuos que levan meses repetindo que o Monte Pindo está
sobradamente protexido poden estar satisfeitos cos froitos da súa magnífica xestión.
Aberto o prazo para inscribirse no voluntariado desta fin de semana
Quen desexe participar nas accións de voluntariado de
SOS Monte Pindo que se desenvolverán sábado 23 e domingo 24, deben confirmar a súa asistencia escribindo un correo a
info@montepindo.org. Ademais, para garantir a cobertura do seguro de accidentes e responsabilidade civil da Asociación Monte Pindo, deben estar previamente inscritos no
formulario de inscrición da páxina web. Agardamos que esa segunda acción será, cando menos, tan proveitosa como xa foi a primeira.
0 comentarios: